بسم الله الرحمن الرحيم
هتكلم عن السفر للنرويج و هى احدى افضل دول العالم فى رأيى الشخصى , طرق السفر و نوعية الفيز المتاحه و هحاول تكون معلوماتى دقيقه و اتمنى اقدر افيدكم .
بداية هتكلم عن معلومات عامه عن النرويج و بعدين هحاول أتناول طرق السفر سواء دراسه او عمل او غيره فى مواضيع مفصله لاحقا ان شاء الله لحين تجميع معلومات كافيه و مفصله و بحيث يكون كل موضوع خاص بطريقه معينه للسفر للتسهيل عليكم .
أولا نظره عامه على البلد
النرويج احدى الدول الاسكندنافيه تقع فى شمال القاره الاوروبيه وتحتل الجزء الغربي من شبه الجزيرة الإسكندنافية بالإضافة إلى جان ماين وأرخبيل سفالبارد , و تتميز كباقى الدول الاسكندنافيه بمستوى معيشه مرتفع يعد من أعلى مستويات المعيشه فى العالم و مستوى رفاهيه مرتفع جدا ايضا
الاسم الرسمى هو مملكة النرويج
العاصمه أوسلو
العمله هى الكرونه النرويجيه ( 1 دولار أمريكى يساوى تقريبا 8 كرونه نرويجى )
اللغه النرويجيه
نظام الحكم ملكيه دستوريه
مساحة البلد 385 الف كم مربع
عدد السكان 5.2 مليون نسمه
حدود الدوله : السويد من الشرق , بحر الشمال من الجنوب , بحر النرويج من الغرب , بحر بارنتس و المحيط القطبى من الشمال
اجمالى الناتج المحلى النرويجى تقريبا 400 مليار دولار عام 2016 و هو متراجع بشكل كبير نتيجة الانخفاض الحاد فى اسعار النفط ( بلغ 522 مليار دولار قبل انخفاض اسعار النفط)
الاقتصاد النرويجي اقتصاد مختلط و يعتمد فى نموه الى حد كبير على موارده الطبيعيه خصوصا انتاج النفط و الغاز و الطاقه الكهرومائيه و قطاع الصيد و قطاع الشحن و التعدين , و بنسبه اقل على الزراعه و الصناعات الثقيله التقليديه , تعد السويد و المانيا اكبر الشركاء الاقتصاديين للنرويج
ثانيا الاسباب اللى ممكن تشجع اى حد انه يفكر فى الاستقرار فى النرويج
المؤشرات الاقتصاديه
1- الدوله بها أعلى مستوى معيشه فى العالم
2- تحتل المركز الثامن عالميا فى متوسط دخل الفرد سنويا ( 70 الف دولار أمريكى ) متقدمه فى ذلك على كل الدول الاسكندنافيه الاخرى ( السويد , الدنمارك , فنلندا ) و ايضا متقدمه على استراليا و كندا , و المركز الثالث اوروبيا بعد لوكسمبورج و ايرلندا
3-النرويج بها واحده من أقل نسب البطاله فى العالم تبلغ 4.8% مقارنة ب 5.8% فى استراليا و 6.8% فى كندا
4- ناتج اجمالى محلى 400 مليار دولار ( كندا 1.5 تريليون و استراليا 1.25 تريليون مع مراعاة الفرق الشاسع فى عدد السكان )
5-معدلات الفائده منخفضه جدا ( 0.5% ) مما يشجع على الاستثمار , ( أستراليا 1.5% و كندا 0.5% مثل النرويج )
6- احتياطى نقد اجنبى يبلغ 43 مليار دولار ( كندا 83 مليار و استراليا 49 مليار مع ملاحظة الفرق الشاسع فى تعداد السكان و الفرق فى حجم الاقتصاد )
7-المركز 22 فى جودة البنيه التحته فى البلاد ( كندا 14 و استراليا 19)
مؤشرات التعليم و التنميه البشريه
1- مصنفه رقم 1 فى التنميه البشريه على مستوى العالم لمده 12 سنه متتاليه طبقا لتقرير الامم المتحده , ( استراليا فى المركز الثانى و كندا المركز التاسع )
2- التعليم فى النرويج مجانى بجميع مراحله حتى التعليم الجامعى و الدراسات العليا مجانيه ( ميزه كبيرة عن استراليا و كندا اللى بيطلبوا مبالغ خياليه فى التعليم الجامعى )
3- مصنفه رقم 25 فى جودة التعلم الاساسى على مستوى العالم طبقا لتصنيف Independent , ( كندا فى المركز 10 و استراليا 14 و السويد 35 و أمريكا 29 طبقا لنفس التصنيف )
4-مصنفه 9 فى تدريس الرياضيات و العلوم ( كندا فى المركز 3 و استراليا 6) طبقا لتصنيف Guardian
5- الجامعات النرويجيه ليها تصنيف متقدم فى كثير من المجالات لكن طبعا تصنيف الجامعات الاستراليه و الكنديه أفضل , مع الاخذ فى الاعتبار ان التعليم الجامعى النرويجى مجانى و التعليم الجامعى فى كندا و استراليا من اغلى نظم التعليم فى العالم
المؤشرات الصحيه و البيئيه
1- معدل الاعمار فى النرويج يبلغ 81.8 سنه تحتل بيه المركز ال 15 , استراليا فى المركز الرابع 82.8 سنه و كندا ال 12 بمعدل 82.2 سنه
2-التأمين الصحى فى النرويج يغطى كافة المواطنين مثل أستراليا و كندا
3- جودة الرعايه الصحيه فى المركز 11 عالميا , استراليا 32 و كندا 30
4- المركز الرابع فى مؤشر السعاده , ( كندا 6 و استراليا 9 )
5-مؤشر الاداء البيئى النرويج فى المركز 17 , استراليا 11 و كندا 25
6-المركز السادس فى أقل دول العالم فى تلوث الهواء
7- الاعتماد فى توليد الكهرباء على طاقه نظيفه بنسبه تفوق 90%
دى كانت نظره عامه على البلد و محاولة عقد مقارنه فى معظم المؤشرات بينها و بين استراليا و كندا و هما المقصد الرئيسى للباحثين عن الهجره
دلوقتى هتكلم عن انواع التأشيرات المتاحه للنرويج و اللى هحاول اتكلم عن كل واحده بالتفصيل بعد كده ان شاء الله
1- لم الشمل الاسرى
2- عمل
3- دراسه
4- سياحه
5- لجوء
6- علاج
7-Au pair
اللى يحب يدور بنفسه على معلومات فى موضوع السفر للنرويج , ده لينك موقع ادارة الهجره النرويجيه هتلاقى عليه كل المعلومات اللى تحتاجها
https://www.udi.no/en/
اتمنى يكون الموضوع مفيد فى انه يوفر نظره عامه عن البلد و ان شاء الله احاول اوضح فى مواضيع قادمه طرق السفر للنرويج .
لا تنسونا من صالح الدعاء .