تويت
أهم النصائح للحصول علي تأشيرة الشنجن من مصر
أهم النصائح للحصول علي تأشيرة الشنجن من مصر
بقلم/ محمد أمين
حلم السفر لأوروبا للسياحة حلم يراود الكثير منا لكن تبقي اسطورة الحصول علي الفيزا هي العائق الاكبر وده خلي اشاعات كتييير تطلع زي مثلا لازم تكون غني و معاك فلوس كتير في البنك عشان تاخد الفيزا , او مثلا مستحيل تاخدها لو باسبورك ابيض او لو اترفضت في سفارة من سفارات الشنجن مينفعش تقدم قبل 6 شهور و ووووو إلي اخره من الاشاعات!
لذلك هنتكلم هنا عن بعض النصائح و كيفية التغلب علي نقاط الضعف الشائعة
أولا خلينا نفهم يعني ايه فيزا شنجن :
فيزا شنحن هي فيزا تتيحلك التنقل الحر بين 26 دولة اوروبية تقع داخل نطاق الشنجن , مش كده و بس , لو معاك فيزا شنجن ساريه تقدر تدخل دول الاتحاد الاوروبي خارج الشنجن زي كرواتيا , صربيا ..الخ.
نبدأ نتكلم عن الأوراق المطلوبة للتقديم :
1- باسبور ساري لم يتم استخراجه قبل 10 سنوات و ساري لمدة 3 أشهر بعد انتهاء مدة السفر المطلوبة.
2- استمارة بتنزلها من موقع السفارة المراد التقديم ليها , بتملاها و بتوقعها في الاماكن المخصصه للتوقيع .
3- صورتين شخصيتين بالمقاس المطلوب من السفارة.
4- كشف حساب بنكي لمدة 3 او 6 شهور حسب السفارة , يظهر مقدرتك المالية.
5- حجز طيران .
6- حجز فندق.
7- جواب HR من شغلك (توضح تاريخ بداية شغلك و المرتب و مسمي وظيفتك) أو شهادة قيد من مكان دراستك او سجل تجاري و بطاقه ضريبيه لو رجل اعمال.
8- وثيقة تأمين بمدة سفرك و بعض السفارات بتطلب ان المدة تكون اسبوعين زيادة عن ميعاد سفرك , الوثيقة دي تمنها في حدود 100-200 جنيه حسب المكان اللي بتجيبها منه .
9- في حالة دي اول مره بتسافر شنجن او باسبورك ضاع بتجيب شهادة تحركات من مجمع التحرير و ده بياخد من اسبوع لاسبوعين.
10- دفع الرسوم و دي حوالي 60 يورو بتدفعهم في حساب السفارة في البنك او في السفارة حسب انت هتقدم لأي دولة .
كل الكلام اللي قلناه ده الكل عارفه نبدأ بقى نتكلم عن أهم اسباب الرفض و ازاي نتغلب عليها:
اولاً كلامي ده موجه فقط للناس اللي عايزه فعلا تسافر سياحه تتفسح مش اللي رايحه عشان تكسر فيزا او تدخل بطريقة غير مشروعه
* اول سبب وأشهر سبب للرفض انك متقنعش القنصل في الانترفيو او في ورقك لو سفاره مفيهاش انترفيو , الناس فاكره انك لو معاك 100 ألف في البنك و ورقك كامل هتاخد الفيزا بسهولة , مش ده اللي هيديك الفيزا , القنصل عايز يتأكد انك مسافر للسبب اللي مقدم ليه وهو السياحه , عشان كده سيبك من كلام الناس اللي بتقولك خش علي tripadvisor وشوف الاماكن المشهوره إيه وخلاص , لأ , انت المفروض تذاكر البلد دي, اعرف فعلا انت رايح هتشوف ايه , هتركب مواصلات ايه من الفندق للاماكن دي , هتسافر ازاي بين مدينه و التانيه , حسس القنصل في الانترفيو انك فعلا عارف هتعمل ايه , لو مفيش انترفيو اكتب خطاب للقنصل فيه تحركاتك بالتفصيل , إدي انطباع انك فعلا رايح تتفسح مش رايح للمجهول.
* تاني سبب ان معندكش كشف حساب او كشف حسابك فيه مشكله , اولا لو معندكش كشف حساب ابدا افتح حساب من دلوقتي عشان مينفعش تقدم من غير كشف حساب , تاني حاجه اسطورة ان يكون معاك عشرين او 30 او 70 الف جنيه كل الكلام ده غلط , اهم حاجه يكون فيه حركه علي حسابك سحب و ايداع , دي اهم من الرصيد , ودي سهلة اعمل حركات كتير علي حسابك , تاني حاجه كل دولة من دول الشنجن طالبه حد ادني في حسابك , مثلا سفارة اسبانيا طالبه يكون حد ادني 64 يوروعن كل يوم هتقضيه هناك بحد ادني 577 يورو في حسابك , يعني اقل من 10000 , اليونان طالبه 50 يورو عن كل يوم , و هكذا , يعني 10 الاف - 15 الف في حساب يكون عليه حركات سحب و ايداع حلو أوي , و كمان لو عندك كريدت كارد صور وجهه و قدم الصوره مع اخر ستيتمنت له.
* تالت سبب هو ان باسبورك أبيض و مسافرتش اي دول قبل كده , طبعا يُفضل انك تحاول تسافر الدول السهلة في الاول زي تركيا , ماليزيا , تايلاند, جورجيا ...الخ , بس طبعا مش مستحيل تاخد الشنجن اول فيزا لو اتغلبت علي السببين اللي فوق , بس فيه حركة حلوة تخلي شكل باسبورك احسن لو فاضي , فرضا انك عايز تسافر دولة من دول الشنجن , من حسن حظك ان الطيران التركي بيطير لمعظم الدول الاوروبية , قدم الاول علي فيزا تركيا , و اعمل برنامج سياحي يومين تلاته في تركيا قبل السفر للشنجن , و قدم حجوزات تركيا دي مع ورقك لسفارة دولة الشنجن بحيث تبين انك هتقعد يومين في تركيا و بعدين مثلا اسبوع في الدولة دي و هيشوفوا الفيزا اللي خدتها و حجوزاتك و هيقتنعوا فعلا انك مسافر , انا شخصيا عملت كده قبل كده و كان القنصل مقتنع جدا خصوصا اني كنت قاري كويس عن البلد.
* رابع سبب حجز الفندق غير موكد , احيانا السفارات بتتصل بالفنادق تتأكد من الحجز , متحاولش تلغي حجز الفندق قبل ما الفيزا تطلع اطلاقا لان ده هيؤدي لرفض فيزتك.
* خامس سبب ان ملكش وظيفة , دي اكتر حاجه هتخوف السفارات منك , لأن وجود وظيفة أو بتدرس في جامعة = فيه ارتباط ببلدك و مش هتهرب , عشان كده تجنب انك تقدم و انت ملكش وظيفة , او حاول علي قد ما تقدر اي حد معرفه يعملك جواب اتش ار في شركته , و ممكن بحوالي 5000 جنيه و عقد ايجار تقدر تاسس شركة و يتكتب في باسبورك صاحب شركة كذا , الطرق كتير اهم حاجه متقدمش و انت ملكش وظيفة , نيجي بقي للناس اللي عندها وظيفة و هتقدم HR , حاول تقدم و يكون عدي عليك اكتر من سنة في شغلك , دي نقطة قوه , تاني حاجه حاول دايما الجملة دي تكون مكتوبة في ال HR " و نحن علي علم بأن السيد / .... سيسافر الي دولة كذا في الفتره من كذا لكذا بغرض السياحة و انه سيعود ليباشر عمله في الشركة من يوم كذا " , الجملة دي بتبين ان شغلك عارف انك مسافر و مديك اجازة في الوقت ده , و دي نقطة قوة في صالحك قدام أي سفارة.
* سادس سبب وجود تضارب في تواريخ حجز الفنادق أو الطيران و التواريخ اللي انت كاتبها في الاستماره , أو مثلا توقيعك في الاستماره غير توقيعك في الباسبور (اه لازم تكون موقع في الباسبور , فيه ناس رجعوها من مطار طوكيو عشان مش موقعين في الباسبور)!
طيب , عملنا كل ده و برضه اترفضت , هل لازم استني 6 شهور؟ لأ طبعا , مفيش سبب يخليك تستني , انا شخصيا ايام تفجيرات باريس في اخر 2015 اخدت رفض غير منطقي من سفارة فرنسا , و بعد اسبوع فقط كنت مقدم في سفارة دولة تانية و اخدت الفيزا في خلال 3 أيام فقط , لمجرد اني أقنعت القنصل اني فعلا مسافر سياحه و اني عارف انا رايح اعمل ايه ... لو خدت رفض دي مش نهاية المطاف , قدم تاني فقط لو متأكد انك جاهز و ان كل ورقك سليم , انما لو مثلا حسابك مش عليه حركات , او مفيش وظيفة , او مش عارف هتعمل ايه في البلد اللي هتروحها , يبقي من فضلك بلاش تقدم دلوقتي لغاية ما تستعد ..
أخيرا اكتر سوال بيتسأل , ايه اسهل سفارات شنجن اقدم فيها؟؟ اللي يقولك فرنسا , و اللي يقول اليونان , و اللي يقول اسبانيا ... اولا خلينا نتفق ان خطوات الشنجن كلها واحده , بس انا دايما شايف ان السفارات الاسهل هي اللي فيها انترفيو بشرط انك تكون فعلا ملتزم بالنقط اللي اتكلمت فيها فوق , القنصل عايز يطمن انك مش رايح تهرب , و انك فعلا عايز تروح سياحه , فانت لو قاري عن البلد اللي هتروحها و واثق من نفسك الانترفيو هتبقي سهلة أوي , انما لو رايح انترفيو و انت مش عارف اصلا البلد دي عاصمتها ايه او جوها عامل ازاي في الوقت اللي هتروحه أو حتي المعلومات العامه عن البلد ساعتها توقع الرفض , انا فاكر انا اتسالت مره في انترفيو عن التعداد السكاني للدولة اللي هروحها , القصد من اللي بقوله لو ناوي فعلا تسافر اعرف لنفسك عن الدولة دي قبل ما تكون بتعرف عشان الإنترفيو ..
انهي المقال بأني اقول اهم النصايح اللي بنسبه كبيره هتضمنلك الفيزا :
- أقرأ كتييييير و خطط كويس للبلد اللي هتزورها .
- حاول متقدمش لوحدك , لما تكون مقدم مع مجموعة اصحاب فرصكم في اخد الفيزا اكبر.
- قدم مع الورق Cover letter أو خطاب للقنصل بتشرح فيه تحركاتك و برنامجك السياحي , دي بتحسن أوي شكل ورقك .
- الـ HR letter يكون مكتوب فيها الاجازة اللي هتسافر فيها .
- اهتم بالحركات علي كشف الحساب اهم من الرصيد نفسه.
- لو عرفت تعمل طيران مؤكد دي نقطة قوه في صالحك , مصر للطيران بترجعلك الفلوس في حالة رفض الفيزا , و الطيران التركي غالبا بيكون فيه غرامه 100 دولار لو لغيت الحجز , اينعم مش مطلوب حجز مؤكد للطيران بس لو قدرت تعمله دي نقطه كويسه اوي و توضح ده في الcover letter اللي هتكتبه للقنصل ان حجز الطيران هو paid and confirmed وتكتب الكونفيرميشن نمبر عشان لو حبوا يشوفوه علي موقع شركة الطيران.
- تجنب انك تقول انك مسافر اكتر من دولة داخل الشنجن -حتي لو كنت هتلف اوروبا كلها- , اكتب انك مسافر الدولة دي فقط و قدم حجز الفنادق داخل الدولة دي فقط , و لما تاخد الفيزا الغي الحجوزات دي و احجز زي ما انت عايز.
و بالتوفيق للجميع ...
============================================