كل المعلومات المتاحة عن اليابان والبوست سيتم تحديثة باستمرار


نقلا عن / اسامة شوقي


هحاول ف البوست اجمع كل المعلومات المتاحة عن اليابان والبوست سيتم تحديثة باستمرار


انا شخصيا بدرس ماجستير هندسه مدنية ف جامعة طوكيو وانا خريج هندسه القاهرة قسم مدني دفعه 2014


1- المنح المتوفرة:

انا شخصيا موجود هنا بمنحه من مؤسسة اسمها JICA دي موجوده ف تقريبا كل دول العالم

التالت بما فيهم مصر وبتمول مشاريع كتير ف مصر زي المتحف المصري والخط الرابع للمترو لكن البرنامج

اللي انا جاي عليه خلص السنه اللي فاتت لكن معلوماتي (هما قالولنا كدا هنا) انهم هينزلو برامج تاني

قريب فتابعهوهم ودي صفحتهم ممكن تزوروهم او تتصلو بيهم
https://www.jica.go.jp/egypt/arabic/office/index.html


الحاجه الاهم ان السفاره اليابانيه بتدي منح بكالريوس ودراسات عليا تحت مسمى Mext ودا لو رحت السفاره الموجوده ف المعادي وسالت هيقولولك على كل التفاصيل وقد يكون عندهم منح تانيه انا معرفهاش..الناس اللي مش من القاهرة ممكن تروح القنصلية وتسال على المنحة دي,,المنحة دي التقديم ليها مرتين ف السنه..ابريل واكتوبر.


كمان ف جامعات ممكن بيكون عندها برامج خاصه بيها وملهاش علاقه بالحكومة زي مثلا الجامعة دي عندها منح دكتوراه مباشرة من الجامعة وانا عملت عنها بوست منفصل بيوضح كل حاجه عن المنحة دي
http://www.kochi-tech.ac.jp/kut_E/gr...admission.html


ودا لينك فيها الجامعات اليابانيه ( طبعا مش كلها ) حضرتك ممكن تفتح موقع كل جامعه وتدور على منح تكون من الجامعة مباشرة او تبعتلهم وهما هيردو عليك
https://en.wikipedia.org/wiki/List_o...ities_in_Japan



ودا فديو عن منح Mext للسفاره ودي اهم منحه تهتمو بيها لانها موجوده دايما كل سنه ف ابريل واكتوبر
جاري تحضير الرابط .....................................

وبرضو لازم تروحو السفاره او القنصليه وتسالوهم عن تفاصيل لو محتاجين( الموضوع يستاهل)



2-لغة الدراسه:


لغة الدراسه للدراسات العليا غالبا هي الانجليزية ولكن معرفتك باليابانيه هيخلي حياتك سهله اثناء

الدراسه لان اليابانيين مش بيتكلمو انجليزي خالص فهتطلع من الجامعه مش هتلاقي حد يفهمك وكمان

بعد ما تخلص لو ناوي تشتغل يبقا لازم لغه..لو عرفت لغه هتلاقي شغل..حاجه كمان حاول تتاكد ان

المشرف بتاعك بيتكلم انجليزي لان ساعات ممكن يكون البرنامج انجليزي وتتفاجئ ان المشرف مش بيعرف

يتكلم انجليزي وتبقى شغلانه ف كل اجتماع لازم حد يترجم وحاجه صعبة..بشكل عام الجامعات الكبيرة

افضل من الناحية دي.. لكن تاني برضو باكد ان اللغه مهمة جدا لو حابب تستقر هنا وتعيش بعد الدراسة.



3-ايه اهم التخصصات المطلوبة ؟



بشكل عام الكليات ذات الطابع العلمي وفيها بحث وتطوير..اكتر شيء مطلوب هنا مجال الكومبيوتر

والبرمجه لكن برضو هندسه وطب بيشتغلو كويس جدا...للي حابب مثلا يعرف وظيفة كذا مطلوبة ولا

لا..ممكن من عالنت تعمل بحث عن الوظيفة دي ف اليابان وتاخد فكرة هل هي مطلوبة ولا لا...بشكل عام

سوق العمل ف اليابان محتاج ايدي عامله بالذات انهم بيواجهو مشكلة تقدم الاعمار وعددهم بيقل.



4-طبيعه البلد وهل في عنصريه؟


اليابانيين شعب حساس ومتحفظ تجاه الاجانب بل تجاه اي غريب حتى لو ياباني.. تعلمك للغه هيكسر الحاجز

دا شوية بشوية..هما شعب طيب جدا ومسالم جداااا..العنصريه مش موجوده ف قاموسهم تماما وفي

حريه دينيه تماما اكتر من اي بلد مسلم ومن حقك تلبس اللي انت عاوزة وامان جدا وبها اقل معدلات

جريمه عالميا..للبنات اللي بتقلق يعني من المواضيع دي متقلقش خالص..اي بنت ممكن تمشي ف نص

الليل ف اي مكان ف اليابان بدون اي خوف او اي قلق خالص..تقريبا هنا مفيش حاجه اسمها سرقة.



5-الناس اللي حابه تدرس بكالريوس؟


في حدود معلوماتي ان الدراسه ف البكالريوس غالبا بالياباني..ممكن يكون ف برامج انجليزي لكن

الحقيقه معرفش عنها حاجه.. طب ايه الحل..ف حل انك تيجي وتدرس ياباني قبل البكالريوس وبيكون

عندهم برامج لغه مخصصه لاعدادك لدخول الجامعة هنا ودا موضوع يطول شرحة لكن باختصار كدا هتحتاج

حساب يكون فيه لا يقل عن 13 الف دولار ويكون حد عنده نفس المبلغ دا كمان ف حسابه يضمنه. انا بقترح

عليكم انك تشوفو اي معهد ف مصر وتبداو جروب لغه مع بعض زي معهد Narita ف مدينة نصر..طيب

الموضوع هيتكلف كام..انت هتدفع مصاريف المدرسه حوالي 5 الاف دولار ف السنه ولو انت جاي معاك لغه تمشي نفسك بيها هتشتغل وتجيب مصاريفك اول ما تيجي..يعني مش شرط ان الفلوس اللي ف حسابك تصرفها كلها..زي ما قلتلكم لو معاك لغة قب ما تيجي هتحتاج بس تذكرة الطيران ومصاريف المدرسة وتمشي حالك بقا بالشغل اثناء الدراسة...الطلبة هنا مسموح ليهم يشتغلو 28 ساعه واقل ساعه ب 10 دولار..انا مش عارف هل الدنيا كدا وضحت ولو جزئيا ولا لا لكن لو حد محتاج يعرف اكتر يسال (بس تكون اساله محددة وواضحه)..وانا هحدث البوست

اللغة اليابانية تنقسم الى 5 مستويات اقلهم N5 واعلاهم N1 ف العادي بياخدو دراسه سنتين ف اليابان..عشان تشتغل وانت طالب عالاقل يكون معاك N4 ودا ممكن ييجي ف 6 شهور مزاكرة كويسة



6-هل ف فرصة اني اشتغل بعد ما اتخرج ؟

الشغل هنا ف المجالات العلميه زي طب وهندسه وعلوم كومبيوتر مطلوب جدا بشرط اجادتك اللغة اليابانية..ولو بتعرف انجليزي كويس كمان فرصك بتزيد اكتر..فانت لو اتكلمت واتعلمت اللغة شغلك شبة مضمون بعد تخرجك من هنا.


7-هل ممكن اشتغل من غير ما ادرس هنا ؟
لو لغتك اليابانية كويسة ممكن من خلال النت تراسل شركه ومش لازم خالص انك تدرس هنا وهتشتغل ف مجالك كمان عشان اليابانيين معندهمش فكرة انك تعمل معادله والكلام دا..انا شفت ناس هنا جت على شغل على طول.



8-التخصصات الطبية:


أنا معنديش معلومات اوي عن الموضوع دا لاني دراستي هندسة مدنية لكن انا شفت ناس هنا بتدرس

طب وكان بالياباني فالافضل انك تتعلم ياباني بحيث حتى تلاقي شغل هنا بعد التخرج..قابلت ناس بيدرسو

بالانجليزي بس بتكون حاجات محدوده وكانت منحه هيا اللي وفرتلهم البرامج دي.



الاهم من دا كلو ان البوست هوا بدايه انكو تبداو تفكرو ف اليابان كاحد الخيارات الكويسة وسوق عمل جيد..انا عارف البوست يمكن يكون مش مجاوب على كل حاجه لاني اكيد نسيت حاجه..فلو حد عنده سؤال يسيب كومنت و طبقا للكومنتات كل شوية هعدل ف البوست بس يفضل لو كانت اسئلة محددة وبعد قراءة البوست جيدا..لان الاسئله العامه زي انا عاوز منحه اعمل ايه بتكون اجابتها صعبه جدا من خلال كومنت وعشان كدا البوست


معمول بحيث تبدا تدور واللي تقابله مشكلة باذن الله نحاول نساعد بعض ف حلها


تحديث للبوست



[COLOR="red"]دليل الطالب للدراسة ف اليابان باللغه العربية
http://www.jasso.go.jp/ar/study_j/__...016_arabic.pdf


دليلي الطالب للدراسة ف اليابان باللغة الانجليزية
http://www.jasso.go.jp/en/study_j/__...gte_2016_e.pdf


الفايل دا بقا فية الخلاصة..دي اهم 5 منح موجوده ف اليابان ودا كتاب انا جمعته من تقارير معمولة عن

طريق منظمة حكومية يابانية اسمها JASSO ودي هيا نفسها بتنزل منح طلابية كتير وهتلاقي جوا

الكتاب دا مكتوب عن المنحة بتاعتهم..الكتاب انا انصحك تقراة كويس هوا حوالي 40 صفحة لكن كويس

جدا ومش هيخليك محتاج اي معلومة زيادة..

http://www.mediafire.com/file/cb94ga...holarships.pdf


ويا ريت الناس تبدا تاخد خطوة لقدام ومش كفايه انك تحلم بس..لازم تعمل حاجه
بالتوفيق للجميع