هتكلم هنا بالتفصيل عن موضوع جورجيا من حيث السفر للسياحة او الاقامة ..

1- جورجيا دولة من دول اوروبا الشرقية عدد سكانها حوالي 3 مليون 750 الف, دولة صغيرة ومجاورة لبعض الدول زي تركيا واوكرانيا وارمينيا واذربيجان وروسيا.
2- هي ليست تابعة للاتحاد الاوروبي ولكن حامل الباسبور الجورجي يدخل اوروبا بدون فيزا ما عدا انجلترا.
3- حامل الاقامة لا يتمتع بنفس امتيازات حامل الباسبور لكن لو مقيم بقالك فترة اكبر من سنة وعندك شغلك بيعلي شوية من نقاطك.
4- اللغة هنا هي الجورجية واللغة التانية هي الروسية الانجليزي قليل اوي بس الشباب الصغير اغلبه بتكلم انجليزي, لكن لو على سبيل قضاء اجازة سياحية ف اللغة مش هتفرق معاك هتعرف تتعامل.
5- جورجيا مش دولة فقيرة ولا بتكح تراب, لكنها لسه يادوب من حوالي 12 سنة اللي خرجت من تحت عباية عصابات المافيا الروسي وبتتعافى مع الوقت.
6- الدولة بتعتبر في صدارة القائمة الخاصة باسهل الدول من حيث المعيشة والاستثمار, الاجراءات هنا فكل حاجة غير معقدة وسهلة.
7- من ناحية الامن, فهي آمنة جداً ويعتبر مافيهاش جريمة, الشوارع كلها مراقبة بالكاميرات والشرطة هنا قوية جداً.
8- مينفعش تيجي وتكسر الفيزا, هنا احلام اللجوء مجرد وهم, وكل يوم هيعدي عليك كاسر الفيزا بحوالي 30 دولار مش متذكرة المبلغ بالظبط بس ف الحدود دي عن كل يوم, الاهم انك لو جيت وفكرت تهرب والكلام ده مش هتلاقي حاجة تعملها, ومش هتعرف تخرج من البلد الا لما تسدد الغرامات عن كل يوم قعدته برا مدة الفيزا.
9- مافيش هنا عنصرية ولا عنف طالما انت كويس ومبتخالفش القانون ومبتعملش تصرفات سيئة محدش هيضايقك, غير كده تحمل العواقب.
10- جورجيا مش ارض الفرص, لأنها دولة صغيرة وبالتالي مافيهاش فرص عمل متاحة خصوصاً لو مش معاك ع الاقل روسي ف انت بتضيع وقت ف المكان الغلط, الافضل لو عندك فكرة بيزنس تيجي تطبقها هنا لانها بتكاليف قليلة بالمقارنة بأي دولة ف العالم وكل الانشطة مسموح بيها من اول التاكسي مرورا بالمطاعم والمحال التجارية لحد المصانع واي نشاط ممكن تتخيله مرتبط بالسياحة بالذات.
11- هنا لو حبيت تعمل لجوء, ممكن تاخده عادي, وهتاخد مرتب ضخم جدا جدا جدا,, 45 لاري يعني حوالي 17 دولار, ولو حبيت تاخد سكن .. هتاخده فحتة احسنلك متفكرش تروحها, وده من وجهة نظري شئ كويس خلي الناس تشتغل وتنتج.
12- الحياة في جورجيا سهلة ولطيفة من حيث الجو العام والناس وتكاليف المعيشة قليلة, 10 لاري بيكفوا اليوم حرفياً, كل حاجة متاحة في الاكل والشرب والحياة الليلية, واسعارها مش غالية.
13- هنا المرتبات متوسطها من 450 لاري ل 1500 لاري, بس احب اكرر فكرة انك تلاقي شغل ف اي مكان دي تنساها الموضوع مش سهل, وان كان في شركات كتير بتطلب مبرمجين وديزاينرز ووظايف مختلفة بس من غير روسي ع الاقل مالوش لزوم تتعب نفسك, من الوظايف المطلوبة برضه مدرس الانجليزي بس اعتقد بدون ما تتكلم روسي ع الاقل برضه مالوش لزمة وجع القلب.
14- عمل الاقامة هنا سهل بس لازم تعمله عن طريق حد محترم وكويس عشان هنا سفاحين بياخدوا من 750 ل 1000 $ عشان يعملولك الاقامة ويا عالم هيتوافق عليها ولا لأ غير مصاريف تانية بتاع التوثيق وخلافه.
15- متصدقش اللي يقولك هعملك اقامة وتعالى هخلصلك كل حاجة ويرسملك الحياة على انها هولندا وده مش حقيقي, من الاخر لو جاي ومش عارف بتعمل ايه وهتعمل ايه خليك فمصر احسن.
16- ممكن تلاقي شغل؟ اه ممكن تلاقي شغل في هنا عرب ومصريين ممكن تشتغل مع حد منهم بس هتتعب شوية على ما تلاقي حد تعرف تشتغل معاه.
17- ممكن تلاقي شغل عموماً لو معاك روسي؟ ممكن بس مش اكيد زي ما قلنا قبل كده الفرص المتاحة مش كتير.
18- هل لو رحت مع نفسي وفتحت شركة وخدت اقامة عليها الحياة هتبقى وردي؟ الاجابة بمنتهى الصراحة لأ لأ لأ , بدون مساعدة حد فاهم طبيعة البلد او يعني Business Guide or Consultation ممكن تخسر فلوسك وتروح, ومتصدقش اي حد يقولك روح مع نفسك وهترزق ولا خد اقامة وبعدها فكر, روح وانت عارف كويس بتعمل ايه ولازم يكون في حد مرجع بالنسبالك يديلك النصيحة ويسهل عليك تنفيذ افكارك عشان متحسش انك وحيد وبائس ومش عارف تعمل ايه, مهما كانت الفلوس اللي هتدفعها لحد بتستشيره اقل بكتير من انك تروح على عماك.
19- متوسط الايجارات هنا للشقق في الاماكن المميزة في العاصمة تحديداً من 200$ ل 500$ حسب المساحة والمنطقة, في مناطق معقوله بايجارات اقل بكتير ممكن مش اكتر من 250$ مثلا لو شقة كبيرة.
20- لو جاي سياحة ممكن تعتمد على نفسك الفيزا اونلاين ب 20$ وغالباً مبتترفضش, مش مطلوب منك انترفيو ولا كشف حساب بنكي بس بعد ما تطلع الفيزا احجز تذكرة طيران ذهاب وعودة واعمل تأمين سفر يغطي مدة سفرك لو هتعمله تبع اليانز مثلاً هيبقى 86 جنيه تقريباً وتحجز فندق او هوستيل عن طريق بوكنج.
عايز شركة سياحة تطلع عن طريقها اختار الشركة اللي حاطة رحلات ضمن البرنامج وتكون مغطية كل حاجة في الرحلة لأن اغلب الشركات بتنظملك الحجز والرحلات بس الخدمة اي كلام, حاول تشوف حد الريفيوهات بتاعته كويسة او حد راح عن طريقها ويرشحه ليك.
21- متسلمش دقنك لحد ويقولك تعالى اعملك اقامة, بكرر نفس الكلام مش هتستفيد حاجة بالاقامة لو مش عارف هتعمل ايه اثناء تواجدك هنا, ومتعملش شركة وتقول هوفر فلوس الاستشارات وتطلع اقامة وبعد كده تحس انك مش عارف بتعمل ايه.
منقول