Vetassess تجربة محمد رشاد في التقييم مع
السلام عليكم
انا الحمد لله النهاردة جالي نتيجة التقييم والحمد لله النتيجة
Positive
انا كنت مقدم علي وظيفة
Statistician
(عارف طبعا انها اتشالت من القوائم) “بس الحلول موجودة ان شاء الله ”
بداية الموضوع أصلا وفكرة الهجرة جاتلي شهر 1 /2017 واخدت القرار بدون تردد والفكرة كانت اني بشوف وظيفتي (Statistician) موجودة على القوائم ولا لا وكانت فعلا موجودة
ثانيا شفت جهة تقييم المهنة وهي Vetassess ودي جهة بتعادل شهادتك بالشهادات الموجودة في استراليا يعني هل البكالوريوس بتاعي مثلا يعادل بكالوريوس في استراليا ولا لا
:ثالثا : بدات اشوف جهة التقييم دي محتاجة ايه أوراق وكانت الاواق المطلوية كالتالي
الجهة دي بتطلب منك المستندات دي
1- صورة شخصية
2- اثبات هوية ( جواز السفر)
3- المؤهل الدراسي ( اللي انت حابب تقيمه) ومعاه المواد الدراسية اللي انت درستها
4- الخبرة الوظيفية وليها شروط
– انها تكون مكتوبة على الورق الرسمي للشركة
– اسمك بالكامل
– نوع العمل هل دوام كامل ولا جزئي
– عدد ساعات العمل الاسبوعية
– المسمي الوظيفي ( واهم خمس مهام ليك )
5- الراتب
– تكون موقعه من المدير المباشر مع رقمه وايميله ( لانه ممكن يتصلو بيه للتأكد من المعلومات المكتوبة)
– مع شهادة الخبرة دي بيحتاجو اثبات لتقاضي الراتب ودي بحاجة من تلاته ( برنت تامينات – كشف حساب بنكي يكون فيه تحويل الراتب – او سند قبض من الشركة )
6- السيرة الذاتية
جهزت الحاجات دي تقريبا خلال شهرين كنت مجهز كل الأوراق اللي فوق دي والحمد لله مكانش في أي مشاكل والأمور مشيت بسرعه جدا ، وعملت اكونت على الموقع وتابعت الخطوات هي الخطوات بسيطة، تكلفة التقييم 810 دولار استرالي.
قدمت الورق اول شهر 4 وجالي النتيجة النهاردة
بعض الملاحظات المهمة اللي ممكن تفيد اللي حابب يجرب
أولا بالنسبة للاسم انا اسمي كان مكتوب ب 3 طرق مختلفة Ezz Eldeen – Ezz Eldein- Ezzeldin في 3 شهادات مختلفة والأمور عدت مفيش مشكلة وانا عشان اتطمن بعت ميل لل Vetassess عشان اسالهم وكان ردهم انه لو الفرق موجود ف حرف مثلا او فرق بسيط ف الاسم مش بيطلبو Evidence of name change
ثانيا : شوية عك كدا من ال
Case officer
هي كانت تقريبا من أصول هندية كان باين من اسمها بس الله يسامحها شكلها كانت بتتعلم فيا
– انا كنت باعت المؤهل هو الماجستير في الإحصاء ( شهادة بمواد التمهيدي – شهادة الحصول على الدرجة )، معجبهاش الكلام ده وبعتتلي تطلب البكالوريوس وبيان الدرجات بتاعه ( طيب ياحاجة انا أصلا تجارة انجلش تخصص محاسبة يعني البكالوريوس تخصص غير الماجستير وانا معادل التخصص وماشي ف قصص كتير كدا ايه لازمة البكالوريوس ، المهم طلع عيني شهر رمضان كله عشان اعمل الشهادات دي – طبعا قعدت اشتم لما جه في التقييم ان البكالوريوس not highly related والماجستير Highly related طيب مانا قلت كده والله من الأول يعني انتي لازم تتعبينا يعني ما علينا
– تاني حاجة من أسبوع كدا كانت باعتتلي ميل قالتلي عايزة بيان درجات للماجستير ( والله ياحاجة انا باعته ) وكمان دليل على الأبحاث العلمية اللي انا ناشرها ( مكنتش فاهم ليه يعني) رحت باعت ميل محترم لل Vetassess وقلتلهم ياجماعة الخير انا باعت بيان الدرجات عايزين ايه تاني وكمان دليل نشر ايه اللي انتو محتاجينو وانا مستني الرد قلت امري لله ورحت الجامعه وقلت اعمل Syllabus بتاع المواد اللي درستهم وخطاب بالتفصيل عن الماجستير طبعا عشان اخلص الكلام ده بسرعه كلمنا دكاتره زمايلنا يكلمو العميد عشان الموضوع يخلص بسرعه
– انا طبعا مستني تقولي عايزه ايه ورق بالظبط لانهم ردو عليا وقالولي انهم عملو Forward للميل ليها عشان ترد راحت امبارح بعتالي ميل بتقولي معلش اتاخرت عليك في الرد والورق بتاعك بيتقيم دلوقتي ( انتي شاربه حاجة يعني ولا ايه مش فاهم متجاوبي عالسؤال) ايه الورق اللي انتي عايزاه
– النهاردة بقي لقيت ايميل جايلي مبروك ياحج التقييم إيجابي طيب ياعم والورق اللي بعمله ده والدوشة اللي دوشتها للناس أقول ايه بس عليكم يلا كله يهون
– بالنسبة لسنين الخبره هما خصمو سنه وحدة
انا طبعا عارف ان الوظيفه اتشالت بس انا كدا كدا مكنش عندي نيه اني اقدم السنادي ” مش مستعد مادياً” لكن الميزة ف شهادة الخبرة اللي عملتها ان فيها وظفتين وهما اعتمدو الاتنين (Lecturer/ Head of statistical and information center) يعني السنة الجاية ممكن اقدم على Statistician او lecturer لو رجعت أي وحدة فيهم واخر اختيار اني اخلص الدكتوراه واقدم Actuary
ودي تجربتي الظريفه مع ال Vetassess طولت عليكم
اه صحيح محدش اتصل يتاكد من أي حاجة
وربنا يوفقنا جميها ان شاء الله
