Engineers Australia ما لا تعرفه عن اعتماد الشهاده والخبره من

ما لا تعرفه عن اعتماد الشهاده والخبره من

Engineers Australia

مبدأيا الهدف من البوست ده مش معرفه ايه هي Engineers Australia لو لسه مش عارف ايه الموضوع اقرأ بوستات مهندس وليد الكيال

ولا الهدف منه اني اقولك تقدم ازاي وايه الاوراق المطلوبه لأن ده تم شرحه بأستفاضه في فيديوهات المهندس محمد صبحي دول
EA Registration Steps -1 BY Eng Mohamed Sobhy
EA Registration Steps 2 BY Eng Mohamed Sobhy

اومال ايه الهدف؟ الهدف اني انقلكو تجربتي الشخصية للافاده لأني استفدت كتير من الجروب وحابب اني ارد الجميل.
تقدر تعتبره المراجعه النهائيه قبل كتابه ال CDR والتقديم او من الاخر (الزتونه 🙂 )

اولا استخراج الاوراق:

الورق اللي هتستخرجه من الكليه هو الجزء السهل. الحاجه اللي مهم اقولها هي ان لو اسمك في الشهاده غير اسمك في الباسبور هتعمل الاتي:
– اطلب تغير اسمك علشان يبقى زي الباسبور ( مش هيرضو 🙁 )
– حاول تاني ( مش هيرضو 🙁 )
– ادخل لوكيل الكليه واحكيله الحكايه هيديلك جواب مفاده ان اسمك في الباسبور هو نفس الاسم اللي في الشهاده وان دي فروق حروف نتيجه الترجمه.

طلعت ورق الكليه؟ ادخل على الصعب بقى – اثبات سنين الخبره –

ببساطه مطلوب شهاده الخبره وطرف ثالث يثبت انك اشتغلت فيها الطرف ده يكون يا بنك ستيتمنت يا خطاب تأمينات او رخصة اقامه او فيزة عمل المهم يكون مكتوب فيهم اسم الشركة

اللي عايز اتكلم عنه هو شهادة التأمينات. هتعمل ايه ؟
– هتطبع الدرافت ده
– الهيئة القومية للتأمين الاجتماعي- منشور 9.pdf
وهو موجود على الجروب وتروح مكتب التأمينات التابع ليه
– هتتطلب خطاب تأمينات ( مش هيرضو 🙁 ) وهيصرو انهم بطلو اصدار الخطابات دي
– هتسيب الشباك وتدخل من الباب تدور على حد وشه سمح تديله الدرافت وتتطلب منه يملاه ويختمه وخلي بالك طوييييييل
– ده بالظبط حصل معايه في مكتبين تأمينات مختلفين فأحتمال حدوثه معاك وارد جدا

ثانيا كتابة ال

CDR:

نصيحتي هي عدم الاستسهال. متدورش على CDR وتكتب زيها. انا عملت كده واترفضت مرتين. اقرأ البوكليت.
معلش تعالى على نفسك. مش قادر وخلقك ضيق؟ خلاص اقرأ بس Section C P22
ديه فيها نموزج لل summary statement for professional engineer اعمل زيه بالظبط بس بتتكلم عن نفسك بطريقة I did or I have, etc..
هتلاقي في حاجات مش فاهم بالظبط هو عايز ايه؟ علشان تعرف اقرأ ال Appendix from page 33 to page 36
عملت ال summary statement اكتب بقى ال 3 episodes يعني امشي بالمقلوب بدل ما تكتب episodes وتلخصها في summary لان الحاجه اللي بتتقري هي ال Summary فلازم تكون مستوفيه لكل شروط ال Professional engineer والا هيقيمك ك Engineering technologist بعد ما تخلص اقرأ النماذج الموجوده على الجروب دي علشان تظبط ال CDR على افضل ما يكون.

CDR-Template-Civil-Engineer-2.pdf
mechanical-engineer-cdr.pdf
CDR-Template-Electrical-Engineer.pdf

راعي التوازن بين الكلام ال technical فال Episodes واداره المشروع مع العلم انه مش فارق معاه المشروع اللي انت شغال فيه سواء برج خليفه او بتشطب شقه المهم انت عملت فيه اي؟ فتجنب المشاريع اللي كنت فيها مدير او سينيور وخليك فالمشاريع اللي تقدر تبين انك عملت فيها ديزاين حتى لو انك عملت ديزاين لشبكه الباور اللي هتغزي كرفانات المشروع مثلا لو انت شغال مقاول.

ثالثا : افتكر دايما ان اللي بيقيمك مهندس زيك. تناقش معاه ورد عليه وسيبك من رهبة الاجنبي استحضر المارد اللي كان جواك وانت بتسلم شغلك للاستشاري او هيئة حكوميه. لو مش عايز مثلا يعترف بفتره معينه في خبرتك اشرح وجهة نظرك وحاول تقنعه. هو في الاخر ملهوش مصلحه انه يضايقك لكن وارد جدا يكون فيه سوء تفاهم. انا رفضلي ال CDR مرتين وكان مصمم يعتمدني ك Engineering Technologist لكن عدلت ال CDR مرتين لحد ما اقتنع بوجهة نظري.
حدد هدفك قبل ما تبدأ. انت عايز تعتمد نفسك ك Professional Engineer وتعتمد عدد سنين شغل محدده ما تيأسش ومتزهقش.

الناس اللي بتفرك : اول رد بيجي بعد 15 يوم عمل لو

Fast track

مع مراعاة ان السبت والاحد اجازه وفرق التايم زون بيخلى الرد ييجي الفجر 🙂

منقول للأمانة …ea