أنا مستغرب شويتين .. لأ شويتين إيه .. مستغرب أوووي بصراحه المصريين – اللي بيقولوا إنهم عايزين يسافروا بره أو يهاجروا – يعتبروا من أغرب الكائنات على وجه الأرض بكل معنى الكلمه ….. هوا مفيش حاجه فعليا تمنعك إنك تكون كائن مفخد مسالم وديع مش عايز تتعب نفسك في أي حاجه .. ده أحد الحقوق الأصيله لحضرتك .. عادي جدااااااا بجد بس اللي مش عادي إنك تكون كده و بتحلم إنك تهاجر “مهو سفير الدوله اللي عايز تروحها أكيد يعني مش هيعدي على معاليك في البيت يديلك الفيزا و مبلغ حلو معاها كده و يقولك إتفضل يا برنس .. مستنيينك بقى .. هاه .. ما تتأخرش علينا يا روح قلبي”! السفر ليه متطلبات .. لو ما سعتش عشان تخلصها ..
هتفضل طول عمرك بتتفرج على أخبار الناس اللي سافرت و إنتا عنيك مدمعه و بس كده .. ده هيبقى آخرك اللي مش عادي إن حضرتك تكون عندك فيس بوك و مش بتستخدمه – بخلاف متابعة أخبار سوسو الجامده و مي العسوله و عبير فرهده! حضرتك الفيس بوك عليه عشرات بل مئات الجروبات المهتمه بالسفر .. سواء للدكاتره أو غيرهم .. اللي مش عادي إنك تبعت رسايل على الخاص تسأل ..
هوا انا كطبيب تخصص كذا .. أسافر أشتغل في إنجلترا إزاي؟!!!! لأ ده إنتا عايز الموضوع من أوله بقى .. ليه تصورت إني مستعد أدفع تمن كسلك و أنتختك في إنك مش عايز تدخل تدور على النت و أدفع التمن من وقتي و أعصابي .. حضرتك لو مهتم هتدخل على النت تدور .. و هتلاقي طلبك و زياااااده .. لا يعقل إنك تقعد على الكنبه أو السرير ساعة مغربيه كده و تفخد و بعدين تقرر في لحظة تجلي .. أنا عايز الراجل ده بقى يحكيلي أمشي إزاي .. و أعمل إيه .. و إزاي أوفق الوقت بين خطيبتي حبيبتي و بين مذاكرة أي زماله .. ده إذا كان المود يسمح بالمذاكره يعني ..
مهو ربنا ما يكلفش حد أكتر من طاقته برضه! لا يعقل إنك تسألني هوا إيه البلاب ده لا يعقل إنك تسأل هوا الرايتنج بتاع الآيلتس بتعدى إزاي .. أصلي سمعت إنه صعب أوي لا يعقل إنك تسأل انا أهلي عايشين في إنجلترا و انا دكتور و عايز أحصلهم .. أعمل إيه .. بس أنا مليش في المذاكره و الزمالات و الكلام ده و مش عايز أتعب .. إيه الحل! لا يعقل إنك تسألني أخبار
السفر للمهندسين إيه بقى .. طيب أنا دكتور .. هعرف منين؟!
حضرتك ليك مطلق الحريه إنك تتعب أو لأ .. إن يجيلك قرح فراش من كتر النوم و القعده في السرير .. إنتا حر تمامااااااا … بس حر في نفسك … مش من حقك نهائيا إنك تضيع وقت حد معاك .. و لا تسأل أسئله موجود إجابتها بكثره على عشرات الجروبات و المواقع .. لو عايز تسافر بجد … إعرف إنك هتتعب عشان توصل لكده .. هتتبهدل بجد .. مش مجرد تعب و بس لو عايز تسافر بجد .. تدخل الجروبات دي و تجيب آآآآآخر الصفحه من تحت خااااااالص .. و تقرا كل موضوع و كل كومنت لحد ما تعرف أدق أدق التفاصيل عن السفر … ده اللي الناس بتعمله ..
و ده اللي أنا عملته لما كنت مهتم بالسفر لأيرلندا مثلا لو عايز تسافر بجد .. لازم تعرف إن محدش بيشرب حد بالمعلقه … المعلومه موجوده .. حضرتك عليك إنك تتعب و تدور عليها .. لو عايز تسافر بجد .. لازم تعرف إن الشغل بره مطحنه ..
و إن دقيقة وقت تساوي كتيرررر أوي هنا … ليك إنك تعرف إني مخلص عمليات في يوم عاااااادي جدا الإسبوع اللي فات الساعه عشره و ربع مسائا .. فأكيد لا عندي وقت و لا أعصاب إني أقولك إيه هوا البلاب مثلا .. لو إنتا مجتهد بجد .. هتلاقي اللي يساعدك .. سواء أنا أو غيري … إمبارح و أنا أون كول كنت ماشي خطوه بخطوه مع زميله فاضله بتقدم للتدريب في إنجلترا .. مجرد ما قولتلها إسم موقع التقديم لوظايف التدريب الطبي هنا .. و قفلت معاها على وعد إني أبعتلها إسم الموقع في رساله و نسيت من ضغط الشغل .. لقيتها بالليل بتسألني عن خطوات إكمال التقديم و محتاره في بعض الإختيارات ..
يعني قفلت معايا و دخلت دورت على إسم الموقع .. و قدمت
و كملت .. ده كله في كام ساعه .. دي الناس اللي تفكر تديهم من وقتك و تساعدهم .. لأنهم ساعدزا نفسهم أساسا
الكام شهر اللي سبقوا سفري لإنجلترا … كل اللي حواليا كانوا عارفين إني مش بعمل حاجه غير التحضير للسفر و الهجره .. و كنت غير مهتم بكل اللي حواليا من أحداث أو أشخاص …
حتى مع أصعب الظروف .. كنت بحاول أسعى و أذاكر و أقرب من الحلم .. حلم الهجره …. إتزنقت ماديا أكتر من مره .. و إتنازلت عن أصول ثابته كانت عندي عشان أعدي المرحله دي …. شوفت أيام صعبه في شغلي .. و الشهر اللي كنت هدخل فيه الآيلتس “و اللي عديت فيه بفضل الله” كنت متعاقب من أحد المديرين عشان عدم لبس البالطو في العياده! كنت مجبر أمضي كل يوم و أنزل مشوار ساعه و نص عشان أمضي و أمشي
.. و أرجع في وقت زيه تاني! كنت واخد معايا حاجات الآيلتس في الميكروباص و شغال سماع أو قرايه طول الطريق رايح جاي ….. قعدت في البيت شهر كامل أجازه .. لا شغل حكومي و لا خاص .. بس بذاكر إنجليزي ..
سايب أهلي و بناتي و قافل على نفسي بذاكر إنجليزي بس … لحد ما عيلتي فكروا إني إتجننت .. سايب إمتحان الدكتوراه و قاعد تذاكر إنجليزي؟؟!!! قولتلهم بيني و بين إنجلترا إمتحان إنجليزي .. و هعديه بإذن الله
محدش سافر و هوا مأنتخ و مريح زي ما إنتا فاكر .. كله تعب و إتبهدل و ضحى كتير لو مش عايز تتعب إنتا حر .. بس ما تتعبش حد معاك وقت الناس بره مصر غالي أوي ..
بلاش تضيعه بكلام ملوش لزوم لو مش هتتعب بجد .. هتفضل مكانك بدون أي تغيير و لا تقدم ما تبعتش رسايل خاصه بدون أي داعي … اللي إنتا عايزه موجود على النت .. أنا مش كاتم أسرار بريطانيا العظمى و اللي أنا عارفه كله من جروبات الفيس المهتمه بالسفر لأوروبا
بالتوفيق للجميع …..
Tamer El Ghobashy
